Pourqhi un Institut du galo ?
L’Institut du Galo a të chomë fin 2016 de la voulance des ajissous du parlement e de la qhulture galèzes d’o la Rejion Bertègn. Il a citrape d’aïder le monde a s’apercher du galo, de li ôfri ene reperzentézon den l’aire foraine e d’étr un piron de la politiqe langaijiere.
Il apouye e il enraye des ajies a sour fin que pour les instiqhucions et le monde de la Haote-Bertègn le galo seje de retour la langue caozée long du temp e q’o seje vayabl den l’aire foraine. L’Institut du Galo a de méme le lot de mettr a ouvraijer d’assembl ene rézille d’ajissous a l’entour le galo, e d’erperzenter les caozous e des ajissous du galo aoprés les instiqhucions e les grandes aguerouées de payiz. Il a enrayë son ouvraije, cante tertout les siens q’ajissent pour le galo, a l’entame de 2017 pour :
- Egâiller l’uzaije du galo den la societë en parlevant sa pllace den la vie publliqe
- Consailler les decidous de la vie publliqe du payis par la vae d’ajies sociales, economiqes et qhulturales
- Parsieudr et apouyer les ajissous du galo et lous projits
I s’apouye sur des mayeneries, des chemines et des afutiaos acordës qi font qe nen peut ouvraijer a sa parchomance, ensourqetout d’o la Charte « du Galo, dame Yan, dame Vére ! ».
